هذا الموضوع إهداء إلى "عبدالواحد ،حسين ،علي الخاطر،محمد الأسود"
أقول لهم تذكروا 3؟؟ يلا على أيدكم إن شاء الله
"أخوكم موسى المحسن"
أبي أعرس
.
.
طبعا كما يطري على بال كل واحد انه يتزوج ولا يرتبط بأحد
برضه يطري لي
هالشي يمثل حلم بالنسبة لآي شاب وشابه
وبعض الشيبان بعد :D
لكن للأسف
الواحد إذا نظر في وضعنا الاقتصادي الحالي
ييأس ويغسل يده بفلاش
.
.
نجي مثلا للذهب
اللي الحين طق سعره في السماء
لو تبي تشتري شبكه ولا صباحه مدري وشي ذا الخرابيط
يبي لك حدود الـ 30 الف
وبرضه المهر
أول البنت يكفيها 30 تكمل احتياجاتها
الحين تعطيهم 50 لا والمنه عليك
يقال لهم مسوين لك دسكاونت
هذا غير الهدايا والمطاعم والتميلح وقت الملكه وفواتير الاتصالات
اللي تقص الظهر
وهذا كله كوم
وإذا جيت للزواج كوم ثاني
.
.
نبد بايجار قصر الأفراح
أول بـ 10 تاخذ لك شي متوسط
الحين يالله 50 وتاخذ لك شي سياحي وما يواجه بعد
.
.
وان جيب لعشا الرجال
كل الناس هالايام قلبوا بوفيهات لأنها ارخص
بعد ماكان يضرب المثل في البوفيه بالكشخه وان ما يحطه الا ناس واو
صاروا الحين يحطونه عشانه أوفر
يعني الذبيحة اللي بـ 1200 ما تواجه
يبي لك من 1500 وأنت ماشي
طبخ الذبيحة اول بـ 100
الحين بـ 200 إذا السعر زين
يبي لك ات ليست عشر ذبايح
يعني 17 الف هذي عشى الرجال
غير الحريم
إذا جيتهم
يبون شي يواجه
ومافيهم سماحة الرجال
يحبون التكلف
نقول يبون 20 الف مع إني ما أتوقع يرضون بالعشرين
وإذا لفيت شوي
قالوا لك الطقاقه ( او زي ما تحب تدلع عمرها الفنانة :D )
طبعا الله يعينك
أول فيصل العليان يجي بـ 12 الحين يالله من الـ 50 وفيها
هذا وصوته مخيس
فما بالك بالطقاقه ؟!
لا وهذا غير تدلعها
تبون بـ عود .. بـ أورق ؟!
وكل شي بثمنه
لا ويتشرطون أنهم يبون بوفيه لهم بلحالهم
ولا يرضون بباقي العشا مثل أول
والحسابه بتحسب
نطلع من سالفة العرس
وطبعا ما راح أناقش شهر العسل
لان إذا أكل الرز والولادة في المستشفى نوع من الفسقه
كيف بيكون شهر العسل ؟!
.
.
نجي لسالفة التجهيز
منيب قايل بيت وبنا وبرابيس
لأنه ما يخفى عليكم
ان طن الحديد الحين وصل 7 الاف
وهو أول يوم وصل 1200 قالوا غالي
الله يرحم أيام كان بـ 920
ويوم وصل 1000
واحدن اعرفه وقف عمار وقال غالي
اجل وش نقول حنا الحين ؟!
الله يرخص الحديد
تجي تاخذ قرض من صندوق التنمية العقاري
تقعد طول عمرك ماسك سرا
الين ما تجي تتوفا ثم يقررون يعطونك القرض
عشان أنت تقوم وبكل ذوق
تعطي القرض ولدك عشان يبني به بيت لولده
طيب كم .. 300 الف ؟!
وش تسوي ذي ؟!
ولا تجيب حق حديد البيت
تدخل على المسئول
يطل في وجهك
وبابتسامه ساخرة وبكل تبلد الإحساس اللي في الدنيا
انا عارف انه ما يكفي
لكن وش تبيني أسوي ؟!
كل واحد يحاول يدبر عمره <-- يسرق مثلا ؟! :D
.
.
نرجع للشقق
بعد ماكانت الشقة بـ 10000 وفي موقع ممتاز وتشطيب حلو
صارت الحين بـ 20 الف لا وخارج منطقه الرياض بعد :D
وياقلب لا تحزن
.
.
تجي تأثث
طقم الكنبات اللي كان بـ 5000 ووش زينه وحليو
الحين بـ 10 الاف ويسمى تمشيه حال وتعبيرة
وغرفة النوم والفرش و .. و .. و
طيب غيرت رايي
قررت اسكن عند أهلي واخلص من صداع السكن
محد يوافق ان بنته تسكن عند أهل زوجها
بعد ماكان من الطبيعي ان البنت تكون ببيت زوجها وعند أهله
الين ما تتيسر أموره ويقدر يبني
ويطلعون سوا ببيت لحالهم
وسجل على الدفتر
.
.
جينا للاعاشه والاستهلاكيات
تبي حليب ؟!
تبي رز ؟!
تبي خضار ؟! <-- ذاك أول
لا تصير مدلل مثل أبقار الدينمارك
وتاكل رز
لازم تغير عاداتك الغذائية
جرب مرة تاكل عدس بدال اللحم
جرب تتغدى بيض وخبز مفرود
لان الصامولي بدال ما كان 10 بريال
صار 6 بريال
لا وصغروا حجمه بعد
واحسب ياللي لك خلق تحسب
.
.
زوجتي حامل
وتبي تولد
وانا متوهق بها
ما ادري وين أوديها لآي مستشفى
وتحتاج حاضنه
ادخل اكلم احد المسئولين
يطل في وجهي بكل برائه
يقول تولد في اقرب مستشفى ولا ليه ما تولد في البيت ؟!
الحريم هاليومين يحبون البرستيج
فعلا الولادة في المستشفى نوع من البرستيج وضرب من ضروب الفسقه
وفقنا الله وزرقنا بيبي صعنون كتكوت امور
تجي تجيب له حليب وحفايظ وانتم بكرامه
تكتشف ان نص ميزانيتك راح تروح على الحليب
وليه تشتري حليب له ؟!
شوف عيني
واحد داخل معه مية ريال للصيدلية
عن عده يبي يرجع بباقي يشتري به خبز وحليب لبيته
شرا حفايظ وحليب أطفال
يوم جاء يحاسب
وبكل ثقة مد المية ريال
قال له ما تكفي
أنصدم وتعجب
لكن وش يسوي ؟!؟!
صار هالمنظر من الطبيعي نشوفه
قام رجع
وبدل البامبرز بنوع ارخص واقل حجم
عشان فلوسه ما تكفي
وخذ هالشي مقياس على كل شي
كل شي ارتفع
والراتب هو هو
فائض ميزانيتنا 300 مليار
وراتب السعودي 1500 ريال ؟!
ويبونه يفتح بيت ؟!
كل شي يغلى ويرتفع سعره
( الغالي للغالي )
إلا راتب السعودي الضعيف
بدال ما يزود
تنقص قيمه الريال
ويصير رياله ما يسوى قرش برا وجوا
.
.
تدرون عاد ؟!
هونت معد أبي أعرس
--~--~---------~--~----~------------~-------~--~----~
دمتم بألف خير
أخوكم موسى المحسن
www.almoshtag.blogspot.com
-~----------~----~----~----~------~----~------~--~---
0 التعليقات:
إرسال تعليق